Prishtinë, 3 dhjetor 2015

Lajmet e fundit janë të njëjta si ato ditë më parë :

Fillojnë si përrallat e bukura :

Na ishte një herë shpresa dhe një qytet i gëzuar

Tani qyteti ka tym, mjegull dhe gurë pikëllimi.

Njerëzit shëtisin të hutuar

Pinë kafe bashkë me fantazma

Rrëfehen para tyre si Konstandini kur sillte Doruntinën te ëma e saj.

Nëpër rrugët e ngushta

Ku mendimet janë të ngushta

Marrin në thua edhe ata që sytë i bëjnë katër.

Na ishte një herë një kohë kur lirinë e prisnim nga lajmet.

Tash lajmet na dëftojnë fantazma që kukurisin dhe njollosin lirinë.

Përtej horizontit në malet e thepisura Shihet dëborë dhe një dimër i acartë pa fund.

Oh, në një ditë vjeshte si kjo Me lirinë e tepruar të imagjinatës

Shoh gra të bukura

Si luajnë me gjethe vjeshte.

Dhe matanë ekraneve një çetë politikanësh

Si bëjnë plane të mjegullta

Një ditë vjeshte si kjo :

Njerëz pa skrupuj shëtisin me fantazma

Ata kanë abortuar lirinë

Dhe shfaqen çdo mbrëmje në ekranet tona të mëdha

Na dëftojnë si formohet mbretëria e marrëzisë

Para syve tanë që s’shohin gjë nga mjegulla.

Një ditë vjeshte si kjo

Ndala orën dhe nëpërmjet dritares sime

Pash silueta njerëzish të mërzitur

Një qytet të mërzitur

Gra të mërzitura

Fëmijë të mërzitur

Dhe një grusht politikanësh të lumtur.