Paris, 7 qershor 2026

Në sheshin Joachim-du-Bellay në Paris, u zhvillua një tubim qytetar në mbështetje të protestës që po vazhdon në Shqipëri. Pjesëmarrësit shprehën kundërshtimin e tyre ndaj një projekti të kontestuar: të lagunës së Nartës dhe zonës së Zvërnecit, por jo vetëm, të cilin e konsiderojnë një kërcënim serioz për një nga ekosistemet më të rëndësishme të biodiversitetit në Evropë.

Nisma, e shpallur si jopartiake, mblodhi kryesisht të rinj shqiptarë të diasporës, organizuar nga katër vajza prej një liste WhtAppi, të cilëve iu bashkuan edhe disa përfaqësues të brezave më të vjetër që jetojnë prej dekadash në Francë. Organizatorët theksuan karakterin spontan dhe qytetar të mobilizimit, i lindur nga shqetësimi për shkatërrimin e mjedisit dhe nga nevoja për të mbrojtur interesin publik në Atdhe.

Përtej debateve mbi pjesëmarrjen dhe mbështetjet individuale, mesazhi kryesor i manifestimit mbeti i qartë: mbrojtja e mjedisit, transparenca në vendimmarrjen publike dhe mbrojtja e pasurisë natyrore shqiptare. Pjesëmarrësit i bënë thirrje autoriteteve shqiptare të anulojnë projektet që rrezikojnë në mënyrë të pakthyeshme ekosistemin e Nartës dhe të Zvërnecit.

Disa pjesëmarrës vlerësuan gjithashtu se ish-zyrtarët qeveritarë që dëshirojnë t’i bashkohen mobilizimeve të tilla qytetare duhet, për arsye koherence dhe etike publike, ish-ministra, të distancohen qartë nga politikat që kanë mbështetur gjatë ushtrimit të funksioneve të tyre.

Megjithë përpjekjet që disa pjesëmarrës i perceptuan si tentativa për instrumentalizim ose ndikime të jashtme, organizatorët këmbëngulën se kjo lëvizje mbetet para së gjithash një nismë qytetare, e mbështetur nga shoqëria civile dhe nga një brez i ri që kërkon një Shqipëri më transparente, më demokratike dhe më të drejtë.

Megjithëse organizatorët kishin kërkuar që manifestimi të mos merrte karakter politik, shumë të rinj nuk mundën ta ndanin çështjen e Nartës dhe Zvërnecit nga realiteti politik që po jeton vendi. Ashtu si në Tiranë dhe në qytete të tjera të Shqipërisë, edhe të rinjtë e pranishëm në Paris shprehën hapur lodhjen e tyre ndaj korrupsionit, përqendrimit të pushtetit, mungesës së llogaridhënies dhe arrogancës së pushtetit e të kryeministrit.

Për shumë prej tyre, mbrojtja e Nartës dhe Zvërnecit nuk është vetëm një çështje mjedisore. Ajo është bërë simbol i një kërkese më të gjerë për ndryshim, për respektimin e ligjit, për mbrojtjen e pasurive publike dhe për ndërtimin e një Shqipërie ku interesi i qytetarëve të vendoset mbi interesat klienteliste dhe politike.

Nga Parisi u dëgjua një mesazh i qartë: mbrojtja e natyrës, lufta kundër korrupsionit dhe kërkesa për më shumë demokraci janë sot pjesë e së njëjtës aspiratë për një Shqipëri të re.

#FlamingoRevolution #AlbaniaNotForSale #SaveNarta #ProtectZvërnec #NartaNukShitet #ShqipëriaNukShitet #DorëheqjeKryeministrit #JusticeForAlbania #ProtectAlbanianNature #NewAlbania #DiasporaForAlbania #StopCorruption #NartaZvërnec #FlamingosForFreedom

©klarabudapost.com